நல்ல சீரகமா, கலப்படமா? எப்படி வீட்டிலேயே சுலபமாக கண்டுபிடிப்பது!

கலப்பட சீரகத்தை வீட்டிலேயே எப்படி சோதனை செய்வது?

சீரகத்தில் கலப்படம் இருக்கிறதா என்று வீட்டிலேயே சோதித்துப் பார்க்க எளிய வழிகள் இதோ:

தண்ணீர் மூலம் சோதனை

ஒரு கோப்பை தண்ணீரில் ஒரு தேக்கரண்டி சீரகத்தைப் போடவும்.

சுத்தமான சீரகம் நீரில் மூழ்கி விடும். கலப்படம் நீரில் மிதக்கும். அல்லது தண்ணீரின் நிறம் மாறி விடும்.

கவனிக்க: தண்ணீரில் சோதிக்கும் போது, சீரகம் மேலே மிதந்தால் பதறி விட வேண்டாம். சிறிது நேரம் பொறுத்துப் பார்த்தீர்களானால், பெருமளவு சீரகம் உள்ளே போயிருக்கக் கூடும். உடனடியாக நீரில் மூழ்காததற்குக் காரணம் சீரகத்தில் இயற்கையிலேயே உள்ள  எண்ணெய்தான்.

இதே சோதனையை வெந்நீரில் செய்து பாருங்கள். பெரும்பாலான சீரகம் உள்ளே போய் விட்டால், அது கலப்படமாய் இருக்க வாய்ப்பு மிகவும் குறைவு.  வெந்நீர், சீரகத்தின் எண்ணெய்யை விரியச் செய்கிறது. மேலும் வெந்நீரின் பரப்பு இழுவிசை (surface tension) குறைவாக இருப்பதால், சீரகம் சீக்கிரமாய் நீரில் மூழ்கி விடுகிறது. அதையும் தவிர மேலே சில சீரக விதைகள் மிதந்து கொண்டிருந்தால்,  அவை அடர்த்தி குறைவானதாகவோ, உடைந்ததாகவோ இருக்கலாம். தவிரவும், சீரகத்தில் உள்ள காற்றுப் பைகளில் காற்று அடைப்பட்டிருக்கலாம்.  அதனால், மிதக்கும் சீரகம் கலப்படமா என்பதை உறுதி செய்து கொள்ள, அவை சீராக இருக்கிறதா என்று பார்க்கவும்.  சீராக இல்லாமலும் பளபளப்பாக இருந்தால், அவை கலப்படமாக இருக்கலாம். 

விரலால்  / உள்ளங்கையில் தேய்த்து பரிசோதனை

சிறிது சீரகத்தை எடுத்து விரல்களில் அல்லது உள்ளங்கையில் வைத்து நன்றாகத் தேய்க்கவும். சீரகத்தில் கலப்படம் இருந்தால், கையில் சீரகம் தேய்த்த இடத்தில் நிறம் மாறி, பழுப்பு நிறம் போல் ஆகி விடும். 

நன்றாக பார்த்து பரிசோதித்தல்

சீரகத்தை உன்னிப்பாகப் பார்த்தும் கலப்படம் இருக்கிறதா என்று தெரிந்து கொள்ளலாம். சீரகத்தின் அளவும் நிறமும் சீரற்று இருந்தாலோ மிகவும் பளபளப்பாக இருந்தாலோ, அது கலப்பட சீரகமாய் இருக்க வாய்ப்பு மிக மிக அதிகம்.