இன்று ஒரு ஆசனம் (14) – பாலாசனம் (Child Pose)

ஒரு குழந்தை கால்களை மடக்கிய நிலையில் குப்புறப்படுத்திருக்கும் நிலையே பாலாசனம். பாலா என்றால் குழந்தை ஆகும்.

ஏன் குழந்தை குப்புறப்படுக்கிறது? ஆறு அல்லது ஏழாம் மாதத்தில் குழந்தை குப்புற கவிழ்கிறது. அதன் பின் அப்படியே வலம் வரத் துவங்கும். தன் மார்பினாலும் மேற்கையினாலும் உந்தித் தள்ளி வலம் வரும். குழந்தையின் இந்த இயக்கத்தினால்தான் அதன் முதுகு, கழுத்து, தோள்பட்டைகள், கைகள் என உடலின் மேல்பகுதி பலமடைந்து, உட்காருதல், தவழுதல், முட்டிப் போடுதல் என அடுத்த நிலைக்கு குழந்தை போகிறது. இந்த நிலைக்குச் செல்வதற்கு முன் படுத்தே தவழுவதால் மார்பு, கை, தோள் என அதன் உடலின் மேல் பகுதி அழுந்தி வலி எடுக்கும். குழந்தை குப்புறப் படுக்கும்போது, மார்பு, தோள், பின் பகுதிகளில் தவழ்வதால் ஏற்படும் இறுக்கம் தளர்கிறது. குழந்தையின் மன அழுத்தம், பதட்டம் குறைகிறது.

இரத்த ஓட்டம் உடல் முழுதும் சீராகிறது. உடல், மனதை அமைதிப்படுத்துகிறது. இவ்வளவும் நடப்பதால்தான் குழந்தை தவழ்ந்து, நடக்கும் நிலைக்குச் செல்கிறது.

இப்போது உங்களுக்குப் புரிந்திருக்கும், இந்த ஆசனத்தை ஏன் செய்ய வேண்டும் என்று. குழந்தை அனுபவிக்கும் அத்தனை நன்மைகளும் இவ்வாசனத்தினால் நமக்கும் கிடைக்கிறது.  குழந்தைகளுக்கு இந்த பலன்கள் கிடைக்கிறது என்பதற்காக அவர்கள் தொடர்ந்து குப்புறப்படுப்பதை அனுமதிக்காதீர்கள்.

தொடர்ந்து ஆசனங்கள் செய்யும் போது தோள் வலி, கை வலி ஏதேனும் ஏற்பட்டால் இந்த நிலையில் இருப்பது அவற்றைப் போக்கி விடும். மனம் அமைதியாகி, மந்தத்தன்மை விலகி, உடல், மனம் இரண்டும் ஒரு குழந்தையின் துள்ளல் நிலைக்கு வந்து விடும்.