மலையேற்றப் பயிற்சியின் நன்மைகள்

மலையேற்றப் பயிற்சியில் என்னென்ன செய்யலாம்?

மலையில் நடைப்பயிற்சி செய்யும்  பொழுது சாதாரண முறையில் நடைப்பயிற்சி செய்வதைத் தவிர இன்னும் சில சுவாரசியமான முறைகளில் பயிற்சி செய்யலாம். 

மலையில் ஓட்டப் பயிற்சி

சமதரையில் ஓடுவதை விட ஏற்றம் மற்றும் இறக்கங்களில் ஓடுவது  மேலும் சிறந்த பலன்களைத் தரும். 

ஸ்வீடனில் நடத்தப்பட்ட ஆய்வு ஒன்றில் வாரம் இரு முறை என பன்னிரண்டு வாரங்களுக்கு தொலைதூர ஓட்ட வீரர்கள் மலையில் ஓட்டப்பயிற்சி செய்ததன் மூலம் ஒரு மராத்தன் ஓட்டத்தை வழக்கத்தை விட மூன்று நிமிடங்கள் குறைவாக முடிக்கும் திறன் பெற்றது நிரூபிக்கப்பட்டுள்ளது. 

மேலும் ஒரு ஆய்வின் மூலம் மலையில் ஓட்டப்பயிற்சி செய்வதால் பிராணவாயு அதிகரிப்பது நிரூபிக்கப்பட்டுள்ளது.

பின்னோக்கி மலையேறுதல் மற்றும் இறங்குதல்

பின்னோக்கி நடைப்பயிற்சி செய்வதால் ஏற்படும் நன்மைகள் குறித்து இதற்கு முன்னரே நாம் பார்த்திருக்கிறோம். மலையேற்றத்திலும் இறக்கத்திலும் பின்னோக்கி நடப்பதால் கூடுதல் நன்மைகள் கிடைப்பதாக பல்வேறு ஆய்வுகள் அறிவிக்கின்றன.

இது குறித்து செய்யப்பட்ட ஆய்வு ஒன்றில், ஏற்றத்திலும் இறக்கத்திலும் பின்னோக்கி நடப்பதால் கால் தசைகள் பலப்படுவதாகவும், முட்டி சார்ந்த பிரச்சினைகள் தீருவதாகவும் நிரூபிக்கப்பட்டுள்ளது. மேலும் சம தரையில் பின்னோக்கி நடப்பதை விடவும் ஏற்றத்திலும் இறக்கத்திலும் பின்னோக்கி நடப்பது தசையியக்கத்தை மேலும் கூட்டி கால் தசைகளை வலுவாக்குவதும் உறுதி செய்யப்பட்டுள்ளது.